أحلى صدفه بحياتي (( روايه سعوديه ))

: 1 ( ...)

الجزء السادس


بعد ما راح الكل على بيته ... طلعت رغد لغرفة ريم .. تبي تعرف وش سالفتها..
رغد: ريومه نايمه حبيبتي..
ريم: لا.. صاحيه .. بس راحوا البنات..
رغد: ايوه راحوا ..
ريم: سألو عني..؟؟
رغد: الا سألو عنك وقلت ان بطنك يعورك شوي.
ريم: زين سويتي..
رغد: ايوه .. خلينا منهم الحين.. وقولي لي وش صار..وش فيه سليمان..
" قالت ريم لرغد السالفه واللي صار معها مع سليمان"
رغد: اللي ما يستحي على وجهه يسألك بعين قويه"رغد تقلد صوته" كيفك ريم؟؟؟
ريومه حبيبتي عشان خاطري لا تضايقين عمرك ولا تكدرين خاطرك والله يضيق صدري لما اشوفك زعلانه..
ريم: والله مو بيدي.. قهرني يا رغد قهرني..
رغد : انسيه..... انسي انك في يوم شفتيه..
ريم بتردد: رغد.... ودي اقولك شي...
رغد بكل حنيه.: قولي بعد دنيتي انتي..
ريم: لما شفت عيون سليمان حسيت بشي غريب حسيت بمشاعر غريبه.. حسيت انه صادق .. بس في بعض الاحيان احس ان مشاعري مختلطه ومو فاهمه شي..
رغد:ايو كملي...
ريم: احس انه يحبني وانه ما يكذب.. ومواقفه معاي تثبت هذا الشي.. تتوقعين يوم ارسل الرساله كان صادق في مشاعره ولا حاب يلعب علي...
رغد: شوفي يا قلبي بقولك كلمتين وحطيهم على بالك زين..اول شي عن المشاعر اللي حستيها يمكن الولد صادق في مشاعره ويمكن يكذب.
وثاني شي انه مهما صار ومهما حاول فيك .... ما ترسلين له او تكلمينه ... وانتبهي على هذا الشي وانا احذرك.. اهلنا اعطونا الثقه والاحترام وعطونا كل شي يمكن عند البنات الثانيات مفقود .. فا حرام نضيع ثقتهم ونحط سمعتهم في الوحل عشان غلطه او زله راح تندمين عليها طول عمرك...واذا كان يبغاك يجي يطلبك رسمي وبعدها حلال انتي وياه سوي اللي تبين بس مو يلعب بعقلك ويستغل صغر سنك مع انه باين انه رجال والنعم فيه... بس الشيطان شاطر...
ريم: كلامك ان شا الله بعيوني..
رغد: ايه هذي اختي بعد دنياي كلها..
ريم ابتسمت : الله لايحرمني منك..
رغد: ولا منك بعد .. يله عاد لاتقلبينها حزن ودموع..
ريم: ابشري .. بس تعالي .. كنتي راح تقولين لي سالفه وش هي..؟
رغد: سبحان الله .. اللقافه فيك فطره..
ريم: هذي شغلتي..
رغد: ايه كنت بقولك ان سليمان هو اللي اتصل على مشاري .. تتذكري يوم رحت للهنوف .
ريم: ايوه..
رغد: ايه في هذا اليوم اتصل عليه والتقوا في التحليه .. وكان مشاري يقول لي انه من زمان ما كلمه...
ريم: اهاااااااا... بس وشلون طرى على باله مشاري..
رغد: والله علمي علمك..
"ريم دخلت جو مع نفسها"
رغد: ريم....ريم ..
ريم: وجع.. وجع.. خير... تراني مو مستغنيه عن اذني..
رغد: وش تفكرين فيه..
ريم: وش عليك..
رغد:بدينا..
ريم:وش رايك تروحين تنومين احسن..
رغد: ايه والله اني دايخه حدي...
ريم: يله روحي غرفتك وتصبحين على خير..
رغد: والله ما تستحين على وجهك ... طيب جامليني شوي.. قولي لي نامي عندي..
ريم: انا صريحه وما احب المجاملات ..
رغد: اقول.. نامي.. نامي يا الصريحه..

&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&



عند سليمان

سليمان: ليش يا ريم كنتي تناظريني كذا..وش كنتي تقصدين بنظرتك... يمكن تقصد الرساله..... الا اكيد كانت تقصد الرساله...انا الغبي يا ليتني ما ارسلت.... البنت باين عليها الحزن...كله مني ومن تفكيري الغبي ... اصلا ما كان له داعي رسايل والله ماله داعي.. هي باين عليها حساسه.... وشكلي جرحتها وجرحت مشاعرها ... اكيد لاني بأي صفه ارسل لها .. طول عمري ... غبي.. غبي... غبي.....

سليمان حاس بتأنيب الضمير اللي ذبحه وما قدر ينام ... لما طلع نور الشمس ويادوب غفت عينه..




&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&

في بيت ابو مشاري

ابو مشاري: وينكم يابنات ماشفتكم من زمان..
رغد:زي منت عارف يبه مدارس ودوامات وتعب ..وانابثالث ثانوي..
ابو مشاي: ايه الله يوفقكم انشاءلله..
ام مشاري:آمين..الا وش اخبار البنات امس؟..
ريم:والله يمه امس وناسه وفله بصراحه....
مشاري: اكيد فالينها ....صراخكم واصل للحاره اللي جنبنا..
رغد: ليش غاير..
مشاري:تكفين وش عليه اغار..
مشعل:الا يا ريم من فاز امس..
مشاري: ليش ما تابعت المباراة..
ريم: وين يتابع المباراة وفيه لين ما تخليه يتنفس..
مشاري: امس فيه لين يا حليلها..
مشعل: اصلا انتي وش عليك مني..
ريم: احنا البنات شايفين المبارة وانت الولد لاهي مع حبيبة القلب..
مشاري: ليش انتو عادين انفسكم بنات انتو صعايده شويه عليكم..
"ريم تذكرت اشالكهم امس وقعدت تضحك"
ام مشاري: وش فيهم بناتي يهبلون كل الرقه والنعومه فيهم.. وبعدين على المباراة عادي شوف الغرب عندهم الحرمه مو تابع الاتلعب عادي..<<<<<الام خطيره..
مشاري: يا ليته على كذا كان زين ... شي اعظم خليني ساكت احسن لي..
رغد تبي تغير السالفه عشان ما يفشلهم قدام اهلهم ..:الا اليوم يمه تراني راح اعزم الهنوف في بيتنا..
ام مشاري: حياها الله بأي وقت هذي الهنوف..مو أي وحده..
مشاري: ودي اشوف هالهنوف اللي مزعجينا فيها ..كل كلمه والثانيه الهنوف والهنوف..
رغد: هذي روحي الثانيه..
مشاري: احلى يا الرومانسيات.
ريم: ايه هذا ولا شي من رومانسياتها هي وصديقتها..
رغد: ليه غايره منها.
ريم: مسكينه اغار..
ابو مشاري: الحمد لله شبعت..
ام مشاري: زين كذا خليتو ابوكم يقوم من الغدا..
ابو مشاري: ام مشاري خليهم على راحتهم انا ما عندي غيرهم..
رغد تبوس راس ابوها: الله يخليك لنا يبه ولا يحرمنا منك..
ريم وقامت تبوس راس ابوها: آمين..
رغد: يا حبك لتقليد..
ريم: ابوي وانا حره بكيفي..
ابو مشاري: انا لكم الثنتين...
مشاري: واحنا يبه لنا الله..
ابو مشاري: والله معزتكم وحده..
ام مشاري: اجل انا المنسيه..
ابو مشاري.: عاد انتي الكل في الكل...
رغد: احلى يا يمه .. احلى يبه على الرومانسيات انا ما اقدر..
ريم: تبغونا نروح عشان تاخذون راحتكم..
ام مشاري استحت: اجلسوا بس كملوا اكل وانتو ساكتين..
صار الكل يضحك على امهم المستحيه...

عند ريم ورغد
العصر بعد الغدا...
رغد: ابقوم اتصل على الهنوف ..
ريم: ليه انتي عندك غيرها...
رغد: يا ربيه هالبنت بتذبحني بلقافتها..
ريم: اتصلي على صديقتك وانتي ساكته..
رغد اتصلت على الهنوف...
رغد: الووووووو.... هلا الهنوف
الهنوف: هلا والله بهالصوت وصاحبة الصوت.
رغد: تسليمين يا قلبي..
الهنوف: ايوه.. كيفك..وش اخبارك..
رغد: الحمد لله بخير وانتي كيفك..
الهنوف: الحمد لله بخير يا قلبي..
رغد: اكيد راح تجين عندي اليوم....
الهنوف: ايه ان شا الله انا قلت لامي ووافقت بس بقى تركي اقوله وان شا الله يوافق ..
رغد سمعت طاري تركي ضاعت علومها: ايه تركي...قلتي تركي...
الهنوف: رغد.... وش فيك ....قلت تركي..
رغد: ايه زين خلاص قولي له وردي علي...
الهنوف : اوكيه قلبي..
رغد: تامرين على شي عمري..
الهنوف: سلامة روحك..
رغد: بااااااااي
الهنوف: بااااااي..
دخل تركي شاف الهنوف تكلم .... ولما خلصت....
تركي: مين كنتي تكلمين ..
الهنوف: اكلم صديقتي..
تركي: احلفي.... ادري انها صديقتك ...من هي..<<<يبي يتأكد انها رغد..
الهنوف: هذي رغد...
تركي بس سمع اسمها تلخبط كيانه: ايه وش اخبارها...
الهنوف بصدمه: خير وش هالسؤال ما تلاحظ انك تمون على صديقتي ..مو كفايه اللي سويته يوم جات عندي....
تركي: عادي انا وش سويت ..قلت لك وش اخبارها ...ما قلت بكلمها..
الهنوف: صدق انك ما تستحي على وجهك..
تركي: عاد احترمي نفسك ..تراك ما تنعطين وجه ..
الهنوف تذكرت الطلعه وقامت تتمصلح:تروك اخوي لاتزعل..
تركي: سبحان الله المصالح تغير اللي ما يتغير .. وش تبغي..
الهنوف: طلب صغير بالمرررررررره...
تركي: هنيف اخلصي علي ..
الهنوف: امممممممممم.......اليوم صديقتي عازمتني..
تركي: وانتي من متى تروحين صديقاتك..هاااااه..
الهنوف: مو أي صديقه هذي رغد اللي عازمتني ...
تركي : رغد...
الهنوف: ايه..
تركي: بما انها رغد واحس انها بنت عاقله ومؤدبه وفي نفسه" وذابحتني" راح اخليك تروحين لها ..
الهنوف: يا بعد قلبي انت خلني اروح ابشرها ...
راحت الهنوف تتصل على رغد..
رغد: هلا والله ...
الهنوف: يا هلا والله وغلا برغد دنياي..
رغد: بشري...
الهنوف: لا الحمد لله وافق......والتفتت تدور تركي لقته ملصق اذنه بالسماعه
الهنوف: رغوده حبيبتي لحظه شوي...............هيه انت خير...
تركي منسجم مع الصوت..
الهنوف تدفه: تريك بعد عن وجهي ...
تركي: يا حبك للنذاله ..........وراح..
الهنوف: معليش رغد ....
رغد:لا عادي بس وش فيك..؟؟
الهنوف: تريك ملصق اذنه بالسماعه ما خلاني اتكلم ..
رغد قعدت تضحك وما سكتت... تضحك ليش ما تدري .... بس تخيلت تركي قامت تضحك....
الهنوف: رغد خلاص عاد يكفي ضحك..
رغد: هههههههههه معليش هههههههه الهنوف ههههههههه والله بطني ههههههههههههه ما قدرههههههههههههه..
الهنوف: اجل بسكر حبيبتي وانتي اضحكي لما يأذن....
رغد : لاتتأخرين بس ههههههههههههه
الهنوف: ان شا الله مع السلامه...
رغد سكرت السماعه وما زلت تضحك: يا حليله والله ...
ريم واللقافه ماكله قلبها : على ايش هالضحك ... الحمد لله والشكر... ومنهو اللي يا حليله...
رغد: تركي ملصق اذنه بالسماعه..
ريم: طيب وهذا اللي مضحكك..
رغد: ايه ههههههههه
ريم: الحمد لله والشكر على العقل.. صدق من قال اكبرهم اهبلهم ...
رغد جاتها حالة الضحك .. تضحك على كل شي : هههههههههههههههه
ريم: رغيد عاد خلاص ما صار...
رغد تضحك ما سكه خط......
ريم: اوووووووف ترى مليت من جد..
رغد تحاول تسكت وخذت نفس: اووووووووووه .........بس تخيلت شكله رجعت تضحك.
ريم: اقوم لأمي احسن لي ............يا المجنونه...
رغد في نفسها" مجنونه بحبه"


في بيت الهنوف

الهنوف في غرفتها محتاره....
الهنوف: ياربيه محتاره ما ادري وش البس..؟؟
ام تركي دخلت على الهنوف: هلا هنوفه حبيبتي لبستي..
الهنوف: والله يا ماما محتاره ما ادري وش البس...؟؟
ام تركي: اجل خليني اساعدك...
الهنوف : يله
%%%%%%%%%%%%%%%%%%%%%%%%%%%%%%%%%%%%%%%%%
واخيرا لبست فستان فوشي وفيه ابيض واورنج قصير لفوق الركبه... ولبست تحته برمودا ابيض وداخله فيه الوان الفوشي وشوي اورنج ..ولبست سندل مرررره نعوم فيه كرستالات فوشي ....وكان شعرها الفراوله وحطت كرستاله في شعرها على جنب فوشيه...وطلعت اخر حلاوه ....وحطت ميك اب مرررره نعوم ..وطلعت ولا باربي...
%%%%%%%%%%%%%%%%%%%%%%%%%%%%%%%%%%%%%%%%
ام تركي: بسم عليك طالعه تهبلين...
الهنوف: من انولدت وانا اهبل بس محد ملاحظ...
ام تركي: اللي ما يلاحظ عمي...
الهنوف: تسليمن يا احلى ام...
ونزلت لعند تركي...
الهنوف: تركي رح قل للسايق يوصلني...
تركي: وليش السايق .... انا اوصلك...
الهنوف تلمس حرارة تركي: متأكد انت مو تمزح...
تركي: ايه متأكد وش فيها اخو يوصل اخته بعد هذي فيها شي..
الهنوف : لا ما فيها شي بس اول مره تسويها...
تركي في نفسه" ان شا الله ان شا لله اشوفها"
الهنوف: تركي......تركي......
تركي: هلا
الهنوف: يله تأخرنا ..
تركي: يلا........
"على فكره ابو تركي دايما مسافر مشغول ولاهي في شغله ويزورهم في السنه مره وام تركي متحمله كل شي عشان عيالها ومدلعه الهنوف عشان ما تحس بفراغ لان ابوها مو موجود"
في الطريق........
تركي: ما ودك تاخذين معك شي...
الهنوف بصدمه: وش هالذرابه والادب اللي نازل عليك...
تركي: طول عمري ذرب وذويق وراعي واجب..
الهنوف تتطنز: بسم الله عليك .. لاتعلم احد اخاف يصكك بعين ...
تركي: هنيف عن السماجه واخلصي تبين ولالأ
الهنوف: ايه ليش لأ ما دامه على حسابك..
تركي:"كل شي يرخص عشان الغاليه" وبعدها ابتسم.....
الهنوف: الحمد لله على ايش تبتسم..
تركي: لابس تخيلتك طايحه من الدور السابع ...
الهنوف": جعلك ما ني قايله ..... استغفر يا النذل...
تركي: هههههه والله لو تصير .... بجد بصير شكلك تحفه....
الهنوف: سوق وانت ساكت واللي يعافيك...
تركي: هذا المحل اسمه اوبرا ..حلو..
الهنوف: هذا ما عليه .. واختار شي سنع...
تركي: تامرين امر..............ونزل...
الهنوف : هالولد فيه شي بس لازم اعرفه..
وبعدها بدقايق وصلو لبيت رغد وكان تركي حاط سيارته عند المدخل وعسى يقز شي....نزلت الهنوف ورنت الجرس فتحت الخدامه الباب كله... ورغد كانت واقفه قباله.... تركي ما صدق على الله وفتح الشباك عشان يشوف زين ... طاحت عيونه بعيون رغد وتركي ابتسم ابتسامه تعذذذذذذذذذذذذذذذذب ... رغد هنا خلاص تحس ان بطنها يعورها وحرارة جسمها مرتفعه ودقات قلبها وصلو المليون ..
الهنوف تطالع رغد وبعدها تطالع تركي وترجع تطالع رغد وبعدها تركي ..لما حست انهم طولوها وهي قصيره سكرت الباب.....
تركي: والله من النذالة يا هنيف......بس والله تهبل تجنن هالبنت مو طبيعيه فوق الخيال فيها شي يجذب بقووووووه ....وحرك سيارته وهو مبسوط..
رغد: هلا والله هنوفه تو ما نور البيت..
الهنوف: توك تتذكريني ساعه واقفه عند الباب..
رغد تفشلت: لاساعه ولا شي...
الهنوف:تناظرين اخوي ما شلتي عينك هبلتي فيه صار مسبوه... ترى ما كان عنده نيه يجيبني اليوم الا يوم درى انه انتي..
رغد ابتسمت:اهم شي جابك..
الهنوف: اهااااا ... الحين عرفت سبب انه صاير ذويق وراعي واجب اثرك لاعبه في عقله..
رغد:الهنوف وش هالكلام وانا وش دخلني فيه..
الهنوف: من شافك هذيك المره وهو مسبه طيرتي عقل اخوي..
رغد: هههههههه شكل ودك تقعدين برا يله تفضلي..
الهنوف: زاد فضلك... تصدقين اشتقتلك..
رغد: مسرع امس شايفتك في المدرسه ..
الهنوف: ولو اشتقت لك..
رغد:عمري انتي.... وش رايك نطلع فوق ونفلها....
الهنوف: براحتك..
رغد: اوكيه ... انتي اطلعي فوق وانا راح الحقك...
الهنوف : اوكيه..
طلعت الهنوف فوق وقعدت تطالع الغرف... الحين هي ما قالت لي أي غرفه.. بس شكلها هذي وراحت الغرفه وهي مستعجله وفتحت الباب بقووووووه......
وانصدمت من اللي شافته.............
شافت مشاري لابس وكاشخ وقاعد عند المرايه يتعطر ومالف عليها ولا حاول يشوف من عند الباب لانه على باله انها ياريم او رغد...
مشاري : ريم .. ما شفت ولف وجهه...........
الهنوف تطالعه ومنبهره بجماله وما قدرت تتحرك رجولها ما تساعدها جماله مخليها ثابته......
مشاري ما قدر يشيل عينه من عليها كان شكلها ساحر وجذاب فيها شي يسحر موطبيعي وجمال خيالي وبرئ ...
مشاري ابتسم ابتسامه تعذذذذذب وتذوووووب الصخر...
الهنوف" ولا بعد يبتسم الظاهر ناوي يوديني المقبره ...."طالعت جسمه" ولا بعد الجسم خيالي"
مشاري"هالبنت فيها شي مو طبيعي وعليها عيون تقطع القلب ..بس غريبه ما تحركت من مكانها بس احسن لي خليني اكحل عيوني بجمالها ..سبحان ربي اللي خلقها..."
الهنوف انتبهت على عمرها وما مكان ودها تتحرك بس استحت على وجها وسكرت الباب ومشت بسرعه ولقت بوجهها رغد...
رغد: الهنوف خير وش فيك طايره ولونك مخطوف..
الهنوف: لابس كأني سمعت صوت رجال فوق...
رغد: ايه نسيت اقولك مشاري فوق..
الهنوف في نفسها" هذا مشاري يا حلوه ويا حلو اسمه.."
رغد: الهنوف وين رحتي..
الهنوف: حبيبتي معاك..
رغد: يله خلينا نطلع للغرفه..
النوف : يله...
طلعوا فوق وعيون الهنوف على باب غرفة مشاري ودخلو غرفة رغد...
رغد: هنوفه بعد قلبي اقعدي شوي وبرجع..بروح اشوف مشاري واقوله انك فيه عشان مايدخل غرفتي اوكيه .. ترى ما راح اطول..
الهنوف في نفسها" شافني وحفظني وخلص": ايوه خذي راحتك..
دخلت رغد غرفة مشاري... مشاري طالع الباب تخيل انها هي<<<حلى كل شوي..
رغد: مشاري انتبه ترى صديقتي بغرفتي..
مشاري: من صديقتك..
رغد: يعني ما عندي الا صديقه وحده واللي هي الهنوف..
مشاري: هذي الهنوف اللي......"توه بيقول اللي دخلت بس انتبه على عمره"
رغد: اللي ايش..
مشاري يصرف: لا كنت بقول اللي ازعجتينا فيها..
رغد: ايه عندك مانع ..
مشاري: لا حياها الله بأي وقت واذا ما شالها البيت تشيلها عيونا..
رغد تطالعه منصدمه: شكلك قاعد اليوم بالشمس كثير .. اروح عند هنوفتي احسن لي..
مشاري في نفسه" والله عندك ذوق يا رغدوه صديقتك صراحه شي يفتح النفس"
ونزل وطلع....
رغد رجعت للهنوف: معليش تأخرت..
الهنوف : لا عادي خذي راحتك ... الا وين ريم..؟؟
رغد: الحين جايه لاتخافين ما تحب تفوت شي..
الهنوف: ايه يا حليلها..
دخلت ريم: هااااي هنوفه...
الهنوف: هاي ريومه كيفك...
ريم : الحمدلله بخير بس خليتي اختي تهلوس فيك..
الهنوف: رغووووده بعد قلبي والله...
ريم :انتو ما تملون من الرومانسيات ..
الهنوف: لاااااااا
رغد: اتركيها ما عليك منها غايره..
ريم: عشان صديقتها فيه تكبرت علينا..بس خليها تروح اوريك......
الهنوف: ما راح اروح بنام عندكم عناد..
ريم: امزح حياك الله أي واذا بتامين عندي ما عندي أي مانع..
رغد: صديقتي ابعدي عنها..
ريم: احلى ياللي تغار..
رغد: هذي هنوفه مو حيا الله..
ريم: يا حليلكم بس..
وكملو السهره ....سوالف وضحك وشوي على خفيف هوشات بس انبسطوا وفلوها وطبعا وشي اكيد لاتخلو من الرقص والحش


ارجو الردود حتي اتشجع لاكمل القصة

: 2 ( ...)

سمسم .... كملي الرواية تراني حدي متحمسة ....

يسلمووووووووووووو كملي ... الله يعافيك

: 1 ( ...)

مشكووورة جداا

قصة رائعة

من جد متحمسة

معها

: 1 ( ...)

والله انها تحمس كمل يلا

: 1 ( ...)

يلا سمسم

بلييييييييييييييييييييييييز

كمل والله مشتاقة اعرف

وش صار

: 1 ( ...)

سمسم كملى

تكفا والله انها حمااس

كمل بليييييييييييييييييييييييييييييييييز

: 2 ( ...)

سمسم كمليها بليز ...

أختي عربجية ناعمة سمسم بنت مو ولد ..

: 1 ( ...)

الجزء السابع


بعد ما طلعت الهنوف من عند رغد....
ريم: يا حليلها الهنوف بصراحه اليوم طالعه قمر ..اسم الله عليها..
رغد: إيه والله اليوم بصراحة طالعه خطيرة..
ريم: إن شا الله تكونين أنتي وياها بالجامعه مع بعض..
رغد: الله يسمع منك .... وهذا اللي مخوفني انو ما نكون مع بعض..
ريم: تفاءلوا بالخير تجدوه..
رغد: ما قلت لك ... فاتك شي خطير...
ريم: وشو اللي فاتني ؟؟؟ ومتى وشلون وكيف ... علميني بسرعه..
رغد: سبحان الله ...دايما مرجوجه ياختي خففي لقافه شوي..
ريم: ما اقدر صار طبع فيني ... بس تكلمي بسرعه..
رغد: تخيلي اليوم تركي شافني..
ريم: بسم الله متى شافك ..
رغد: يوم جاء ينزل الهنوف ..الخدامه فتحت الباب كله وصرت انا بوجهه..
ريم: واكيد ما كلفتي على نفسك وتعبتي عمرك وبعدتي عن الباب..
رغد: كنت بأسويها بس ما قدرت يهبل.. يهبل يا ريم ولا وكاشخ وسكسوكته مكثرها طالع شكله توب..
ريم على طول جاء على بالها سليمان: اهااااااااااااا..............
رغد حست فيها: ريم حبيبتي وش فيك..
ريم: ما فيني شي كملي..
رغد: وش اكمل خلصت السالفه..
ريم: صدق ما عليش ما نتبهت .. بروح انام تعبانه حدي..
رغد ضاق صدرها على اختها لانها تعلقت بواحد ما تدري وش مشاعره تجهها وهي توها صغيره وما تستاهل
ريم وبخاطر مكسور: تصبحين على خير..
رغد: وانتي من اهله..

راحت ريم لغرفتها ونسدحت على السرير ...آآآخ يا سليمان كنت من يوم يجبون طاريك افرح .. والحين من اسمع أي شي يذكرني فيك يضيق صدري...بس والله حبيتك من كل قلبي...واتمنى من كل قلبي ان تكون ضنوني كلها خطا وان اللي حسيته بعيونك هو الصح.. يارب ...يارب...ابغى الحقيقه ... ابغى لو نور بسيط بوسط الظلام اللي انا عايشته...ابغى بس ..بس حبل اتعلق فيه.. ابي ذرة امل من حياة كلها يأس ... يارب... يارب..ونامت ودمعتها على خدها وترتجي ان سليمان يحبها لانها ما تقدر تعيش بدونه ..


في بيت الهنوف

" حبت اقول شي ان الهنوف وتركي توأم بس ما يتشابهون اكيد ومتنا قضين في كل شي.."



كانت الهنوف وامها جالسين بالصاله...
ام تركي: هاه .. حبيبتي ان شا الله انبسطتي عند رغوده..
الهنوف: والله انبسطنا وفليناها بصراحه اختها رورو تهبل فله...
ام تركي: وهي بأي سنه..
الهنوف: هي بثالث متوسط...
ام تركي: ما شا الله .....الله يخليها لاهلها..
الهنوف: امين ..
دخل تركي...
تركي: احلى سلام لأحلى موجودين..
ام تركي: هلا والله بوليدي
تركي: هلا يمه وشلونك وش اخبارك..
ام تركي: بخير دامك بخير..
تركي: اهلين بأختي الهنوف وش فيك ساكته انبلع لسانك..
الهنوف: تركي اذا بتستخف دمك خلني اقوم احسن لي..
تركي: لا خلاص اجلسي بأسكت ..
الهنوف جلست تبغى تفضحه عند امه يعني جلست شر:ايه صح تركي نسيت اقولك ..وش عندك اليوم اليوم تقز صديقتي قز...
تركي يصرف الموضوع: انا.........متى..؟؟
ام تركي: وش السالفه .. اخوك وش فيه وش مسوي ...
الهنوف: يمه ابد سلامتك ...بس تركي قعد يطالع صديقتي رغد لما حفظها ولو اقوله ارسمها رسمها..
ام تركي: تركي الكلام اللي تقوله اختك صح...
تركي: يمه ما عليك منها احقريها ...عاد من زينها هي وصديقتها<<والله العكس..
ام تركي: اسمعني زين...ياتركي انت ما ترضى احد يطالع بأختك وشلون عاد بنات الناس .. ولا اقرب الناس لاختك اللي ما تعتبرنا غير اهلها وما تعتبر الهنوف الا اختها الثانيه..
تركي: يمه ما طالعت احد..الهنوف تبالغ..
الهنوف: يمه يعني ما تعرفين سوالف ولدك ما هي جديده..
تركي: انتي اسكتي ولا والله لا اقوم واعلمك الادب..
الهنوف سوت اللي براسها: انا طالعه فوق .........يمه تصبحين على خير<<<<نذله..
ام تركي: وانتي من اهله ...... وتغطي زين لا يحوشك برد..
تركي: يمه أي برد واللي يعافيك ... الدنيا تطبخ من الحر..
ام تركي: ولو اخاف على صحة اختك ...
تركي: انا المنسي بالسالفه..
ام تركي: انت اترك سوالفك وانا احطك بعيوني..
تركي معصب: انا طالع .......تصبحين على خير...
ام تركي: وانت من اهله ..... الله يهديك ياوليدي .... وتجوز عن هالحركات اللي مالها داعي..


عند مشاري


مشاري منسدح على السرير ويفكر: الهنوف ... حبيت هالاسم وصاحبة الاسم ... شكل البنت فله رومانسيه مو مثل اللي عندنا<<<الولد متعقد..
ولا وباين عليها نعومه .. وعيونها احس فيها لغز ...من البراءة اللي فيها...انا لازم افاتح امي بالموضوع ...كل يوم تحن على راسي تزوج تزوج ..الحين اخليها تخطبلي من بكرا<<< الاخ مستعجل..
انا الحمد لله ادرس واشتغل مع ابوي في الشركه وما قاصرني شي .. بس اخاف تقول دراسه وما دراسه ومو الحين او ما افكر بالزواج..بنات هالايام دلعهم زايد..بس ان شا الله انها مو منهم ..."وقعد مشاري يفكر طول الليل لحد ما استقرت الفكره براسه وبعدها نام"



عصر الجمعه

ريم تكلم ساره..
ساره : سمعتي بالخبر..
ريم: لا ما سمعت شي..
ساره: الرياض كلها درت معقوله ريم ما تدري..
ريم: ساره اخلصي شنو...
ساره: فيه مؤتمر بينعقد في الرياض وعطونا اجازه يومين يوم الثلاثاء والاربعاء ...ومع الخميس والجمعه صاروا اربع ايام..
ريم والدنيا مو سايعتها من الفرح: قولي والله....الله من جد وناسه ياااااااااااااااي فله..
ساره: ايه ترى بس الرياض اللي فيها الاجازه..
ريم: بصراحه مساكين الباقي بس اهم شي ان هالاسبوع نصه اجازه..
ساره: ايه عاد خططوا عليه صح..
ريم: لاتنسين دائما وابدا معك ام الافكار..
ساره: لا ما نسى ابد..
ريم: والله والله وناسه ..بروح ابشر رغد...
ساره :اجل يله ما اطول عليك مع السلامه واشوفك بكره ان شا الله ..
ريم: ايه ان شا الله .. مع السلامه ..

وراحت ريم على طول عند رغد..
ريم: رغد.. رغد..بسرعه بسرعه..
رغد: خير وش فيك؟؟
ريم: سمعتي بالخبر..
رغد: أي خبر؟؟
ريم: خبر الاجازه..
رغد: ايه توني مسكره من الهنوف تبشرني..
ريم: والله فله وش نخطط عليه..
رغد: الهنوف ما شا الله عليهم بيروحون الشرقيه..
ريم: الشرقيه... والله فكره..
رغد: وشو اللي والله فكره..
ريم: نروح الشرقيه احسن من الرياض ومنها سفره..
رغد: والله وناسه اهم شي اكون مع صديقتي..
ريم: وانتي هذا اللي هامك ... صديقتك واخوها..
رغد: يا اللي ما تستحين على وجهك عيب تقولين هالكلام لاختك الكبيره..
ريم: يعني تلعبين على نفسك انك ما تحبينه او حتى ما تفكرين فيه..
رغد صارت تفكر انها احتمال تشوف تركي وعاااااااااااااااااااااااشت الجو....
ريم: رغد....رغد...... لا البنت راحت فيها لروح لامي احسن لي ... واقولها عن مخططاتي..
رغد ما زالت تفكر بعمق...<<< اهم شي بعمق..


ام مشاري: والله ما ادري يا ريم قولي لابوك ومشاري..
ريم: يمه والله الشرقيه فله ووناسه وكل الناس بيرحون لها ... وخلينا نروح احنا وعمتي وعمي وخالتي بعد..
ام مشاري: ابقول لابوك ونشوف..
ريم: يمه حاولي فيه وان شا الله بيوافق..
ريم مسكت التليفون وبدت نشرة الاخبار..<<<<ام هلال...
ريم: ايوه عبيرمثل ما قلت لك قولي لابوك لحد ما يوافق..
عبير: والله لو نروح من جد بنبسط ..
ريم: اكيد ما يبغالها . بس ما اوصيك حاولي حاولي ولا تخلي اليأس يتغلب عليك..<< تأثير الحماس
عيبر:وينى فيه في معركه..
ريم: ههههههه المهم انا بروح اكلم البقيه مع السلامه..
عبير: مع السلامه..
@@@@@@@@@@@@@@@@@@@@@@@@@@@@@@@@@@@
ريم: فجر مثل ما وصيتك..
فجر: لا توصين حريص اصلا امي ما يبليها شي على طول بتوافق..
ريم: المهم علميني بأخر المستجدات..
فجر: اوكي...
&&&&&&&&&&&&&&&&&&&&&&&&&&&&&&&&&&&&&&&&&&&

الحين راح اعرفكم على خالتهم..
ام فيصل: هي اخت ام مشاري الوحيده وما عنها الا بنت وحده وولد واحد..
ابوفيصل: رجل اعمال كبير ومشهور وتستفيد منه شركة ابو مشاري وابو ماجد..
فيصل: الولد الوحيد مثل ما قلت عمره (20) سنه بالجامعه..وسيم لابعد درجه اسمر وسماره يذبح وجذاب وعيونه سود وكحيله وطويل ومايل لنحف شوي ..بس السكسوكه ما يبلها كلام محليته وطالع ولا احلى..
شجون: دلوعة امها وابوها واخوها<<<من بقى..
عمرها(17)سنه ...تشبه فيصل بس ملامحها ناعمه واكثرشي ما خذه العيون الكحيله ..حبوبه وطيوبه بس فيها دلع شوي...

&&&&&&&&&&&&&&&&&&&&&&&&&&&&&&&&&&&&&&&&&&&&
ريم: هلا شجون..
شجون: اهلين ريومه..
ريم: وش اخباركم.
شجون : الحمد لله..
ريم: اكيد سمعتي بالخبر.
شجون: تقصدين الاجازه..
ريم: ايوه عليك نور..
شجون: ليش وش فيها..
ريم: احنا خططنا نروح الشرقيه..
شجون: من جد اجل احنا معاكم..
ريم: اوكيه قولي لخالتي واتفقي معاهم عشان نروح مع بعض ...اوكيه..
شجون: اكيد...اوكيه ما يبلها كلام..يله باي..
ريم: باي..

ريم رجعت لعند رغد بغرفتها وما زالت رغد بنفس الوضعيه اللي تركتها فيها ..
ريم: الحمد لله على العقل صدق البنت خبله........رغد....رغد..
رغد: هااااه .....نعم....خير..
ريم: الخير بوجهك ....هيه انتي اصحي ....اصحي..
رغد: ليه شايفتني نايمه..
ريم: تدرين صار لك نص ساعه وانتي على هالحااال ..
رغد: اخلصي وش تبين ...تراك قطعتي حبل افكاري..
ريم: طيب لزقيه ههههههههههههههههههاي ..
رغد: هه هه هه بايخه يا الباخيه..
ريم: المهم انا كلمت امي وبيت عمي وبيت عمتي وبيت خالتي عن الشرقيه..
رغد: الله االله مسرع ما صدقتي خبر ما شا الله عليك المفروض تصرين صحفيه..
ريم: بسم الله علي من عيونك..
رغد: ما شا الله عليك..
ريم: ايه كنت اقولك خلينا نجهزالاغراض الحين عشان الحماس..
رغد:طيب قلتي لابوي..
ريم: خلاص انا قلت لاعمامي اكيد بيوافق وانا اقول نمشي الاثنين احسن..
رغد: وانتي على كيفك بتمشين الرجال.
ريم: ايوه انا ريم عن عشرة رجال..
رغد: ايه واضح عليك..
ريم: ونغيب من المدرسه الاحد عشان نستعد للرحله..
رغد: حرام وش بقيتي السبت كمليها وخلصي نفسك..
ريم: ودي بس ابي اشوف سارونه واودعها..
رغد: ايه زين فكرتي فيها..
ريم: خلينا ننزل عند امي..
رغد: يله..
ونزلو تحت لعند امهم بالصاله ولقوا ابوهم ومشاري ومشعل..
ريم: هااااااااي..
رغد: هاااااااااااااااي..
ابو مشاري: وش هاي ..قولو السلام عليكم..
ريم: ان شا الله يبه من عيوني المره الثانيه..
مشعل:يبه ما تعرف على قولتهم حركات بنات..
رغد تهمس لامها: يمه قلتي لابوي عن موضوع الشرقيه..
ام مشاري: ايه قلت له وبعدين دقوا عليه اعمامك وقالوا موافقين..
رغد: ايه زين الحمد لله......................ريم..ريم..
ريم: خير..
رغد: ترى اعمامي وافقوا واتصلوا على ابوي .. وابو وافق..
ريم: واااااااااااااي ونااااااسه..
مشاري: اجل يبه بنروح الشرقيه.
ابو مشاري: ايه ان شا الله..
ريم: بابا ودنا نمشي يوم الاثنين..
ابو مشاري : والدوامات والشركه..
ريم: بابا عادي خذوا اجازه..
ابو مشاري: هاه مشاري وش رايك..
مشاري: والله يبه الشركه مستقره وعادي لو نروح من يوم الاثنين..
ابو مشاري: اجل الاثنين الاثنين..
رغد وريم: يس...
مشاري : قلتوا لاعمامي وخالتي..
ام مشاري: ايه ريم ما قصرت ما بقت احد الا وقالت له..
مشاري: ايه عاد ريم واللقافه ونشر الاخبار تلقينها..
ريم حاقرته وما ردت عليه..
مشاري دق موبايله: عن اذنكم..
ابو مشاري: اذنك معك..
مشاري: الو هلا سليمان..
ريم سمعت سليمان ذبت اذنها عنده
سليمان: هلا والله كيفك؟؟
مشاري: والله الحمد لله بخير .
سليمان: الحين وش عندك..
مشاري: ابد قاعد مع الاهل..
سليمان: اجل اشغلتك.
مشاري:: لاعادي....اسمع الاهل بيروحون الشرقيه تخاويني..
سليمان:والله ما ادري..
مشاري: عادي انت والاهل وخل الاهل يتعرفون على بعض..
ريم سمعت بس ان مشاري قال تخاوينا الشرقيه وقلبها تحس انه بيطلع من مكانه ..
مشاري: اجل استشير الاهل ورد علي..
سليمان: اوكيه خلاص تامرني بشي ..
مشاري: سلامتك ...مع السلامه..
سليمان: مع السلامه..
ورجع مشاري لعند اهله..
ام مشاري: اجل هذا سليمان...
مشاري: ايوه وقلت له يجي ومعه اهله معنا للشرقيه..
ام مشاري: زين سويت خلينا نتعرف على اهله شكلهم ناس اجاويد..
ريم ما تحملت انهم يتكلمون عن سليمان ..وقامت لان عيونها بتفضحها وكانت خانقتها العبره مشتاقه لسليمان وفرحانه وضايق صدرها بنفس الوقت.......وقامت ولحقتها رغد....................
رغد:ريم وش فيك؟؟
ريم: يعني ما سمعتي انه بيروح معنا للشرقيه ..
رغد: طيب وش فيها..؟؟
ريم: انا ما اقدر اتحمل ..
رغد:هذا الشي بيكون من صالحك عشان تعرفين وش مشاعره..
ريم قعدت تفكر: صح انا لازم اعرف وش اخرتها معك يا سلمان ولازم اصفي اللي بينا ..
رغد: المهم لاتتعبين نفسك من التفكير كل شي مع الايام بيوضح ....
ريم: ان شا الله ..................


ارجو الردود و اشكر كل من اهتموا بقراءة او الرد علي مواضيعي و كل عام و انتم بخير
دمتم بود

يسلمو سيمسم
وكل عام وانتي بالف خير